הלכות חפץ חייםחפץ חיים – הקדמה (6)
אויך האב איך מחבר געווען אויף דעם ספר א לאנגע און ברייטע פתיחה, וואו עס ווערט ערקלערט וויפיל לאוין און עשין עס פלעגט עובר זיין דער וואס היט זיך נישט פון דעם ביטערן איסור פון לשון הרע און רכילות; אפשר וועט השם געבן אז דורך דעם וועט דער יצר הרע געשלאגן ווערן, ווען ער וועט זען די גרייס פון דער מהומה און דער מכשלה וואס ער ברענגט דורך זיין רעדן.
אויך חוץ דעם, איז באוואוסט וואס עס ווערט געברענגט אין מדרש רבה פרשת נשא (י"ד, ד'), און אזוי זענען זיינע ווערטער: אויב דו האסט זיך א סך געמיט אין זייערע ווערטער, נעמט הקב"ה אוועק דעם יצר הרע פון דיר. דעריבער האב איך געזאגט צו מיין הארצן: מעגליך אז דורך דעם וואס מען וועט זיך אריינקוקן אין דעם ספר, וואס איז צוזאמגעקליבן פון אלערליי ווערטער פון די ראשונים אין דעם ענין, און מען וועט זיך אין אים פארטראכטן, וועט דער יצר הרע נישט אזוי שטארק געוועלטיגן אין דעם ענין.
און ממילא, ווען ער וועט זיך פון אנהייב אביסל אפציען פון דעם עוון, וועט ער מיט דער צייט אפציען זיין האנט דערפון אינגאנצן; ווארום אין דעם עוון מאכט די געוואוינהייט א סך, און "הבא ליטהר מסייעין אותו" – דעם וואס קומט זיך מטהר זיין, העלפט מען אים (יומא ל"ח ע"ב). און אין דעם זכות וועט "ובא לציון גואל" במהרה בימינו, אמן.